Андижондаги ёнғинда яна бир инсон оғир аҳволда шифохонага олиб кетилди
Бош прокуратура фожиа бўйича қўшимча маълумот берди.
Аввал хабар берилганидек, Андижон вилояти, Асака туманида жойлашган автомобилларга хизмат кўрсатиш шаҳобчасида ёнғин содир бўлди. Ҳодиса оқибатида бир нафар ишчи ҳалок бўлди, яна бир фуқаро оғир тан жароҳати олган эди. Ёнғин вақтида устахонада бўлган “Labo” русумли автомобиль тўлиқ ёниб кетган.
Ҳодиса юзасидан Ўзбекистон Республикаси Бош прокуратураси қўшимча маълумот берди. Унга кўра, воқеа жойига Андижон вилояти прокурори топшириғи билан махсус ишчи гуруҳ етиб бориб, дастлабки тергов-суриштирув ишлари олиб борилди. Дастлабки хулосаларга кўра, ёнғин устахонада ишловчи С. исмли фуқаронинг эҳтиётсизлиги туфайли юзага келган. Афсуски, у ёнғин жойида ҳалок бўлган.
Мазкур ҳолат юзасидан Жиноят кодексининг 259-моддаси 2-қисми "а" банди — ёнғин хавфсизлиги қоидаларини бузиш оқибатида одам ўлимига сабаб бўлиш билан жиноят иши қўзғатилди. Тергов ҳаракатлари Асака тумани ички ишлар бўлими томонидан олиб борилмоқда.
Вилоят прокуратураси тергов жараёнларини ўз назоратига олган. Шунингдек, ҳодиса бўйича суд-тиббий, ёнғин-техник ва бошқа зарур экспертизалар тайинланган. Тергов ишлари давом этмоқда.
