“Sea Breeze Uzbekistan” лойиҳаси юзасидан ҳукумат қатъий талабларни белгилади

Сўнгги ойларда жамоатчилик орасида кенг муҳокамаларга сабаб бўлган “Sea Breeze Uzbekistan” туристик лойиҳаси юзасидан ҳукумат қарори қабул қилинди. Аввалроқ экологик фаоллар ва фуқаролик жамияти вакиллари томонидан билдирилган хавотир ва таклифлар инобатга олиниб, лойиҳа бўйича инвестор зиммасига қатор қатъий мажбуриятлар юклатилди. Бу ҳақда Экология вазири маслаҳатчиси Расул Кушербаев хабар берди.

 

Хусусан, Тошкент шаҳрининг ичимлик суви манбаи бўлган Чорвоқ сув омбори ва Чирчиқ дарёсининг экологик хавфсизлигини таъминлаш мақсадида қуйидаги талаблар белгиланди:

 

Лойиҳадан табиий сув ҳавзасига сув тушишига йўл қўйилмайди;

 

Ёпиқ сув айланиш тизими жорий этилиб, барча сув сарфи инвесторга тегишли замонавий технологиялар ёрдамида қайта ишланиши шарт;

 

Бу тизимни яратиш ва эксплуатация қилиш харажатлари тўлиқ инвестор ҳисобига амалга оширилади.

 

Қарорда, шунингдек, агар ушбу экологик қоидалар бузилса, лойиҳа қурилиши тўхтатилиши, инвестиция шартномаси бекор қилиниши ва ер майдони қайтариб олиниши қатъий белгиланиб қўйилган.

 

Лойиҳани амалга ошириш жараёнида Бош прокуратура барча шаҳарсозлик ва экологик меъёрларга риоя этилиши устида алоҳида назоратни амалга оширади. Вазирлар Маҳкамаси билан биргаликда, лойиҳа бошланишидан тортиб, объектлар фойдаланишга топширилгунига қадар ҳар бир босқичда қонунийлик ва шаффофликни таъминлашга масъул бўлади.