Путин Трамп билан қаерда учрашмоқчи эканини айтди
Унинг фикрича, учрашув учун мос жойлардан бири — БАА.
Россия етакчиси Бирлашган Араб Амирликлари президенти Шайх Муҳаммад бин Зоид Ол Наҳаён билан Кремлдаги учрашуви вақтида унинг мамлакати Трамп билан учрашув учун мос жойлардан бири эканини айтди.
“Бизда буни ташкил этишда ёрдам беришга тайёр кўплаб дўстларимиз бор. Уларнинг бири — БАА президенти. Менимча, биз мазкур масалани ҳал қиламиз, лекин бу учрашув ўтказилиши мумкин бўлган анча муносиб жойлардан бири бўларди”, — деди Россия президенти журналистларга.
Путиннинг айтишича, Москва ҳам, Вашингтон ҳам икки давлат раҳбарлари ўртасидаги учрашувга қизиқиш билдирган. У, шунингдек, Зеленский билан учрашишга қарши эмаслигини, бироқ бунинг учун зарур шарт-шароитлар яратилиши кераклигини, ҳозирча эса бу имконият эҳтимоли ҳали узоқ эканини қўшимча қилди.
