Трамп ва Путин нималарни муҳокама қилмоқчи?
Икки гигант раҳбарнинг учрашув тафсилотлари очиқланди.
АҚШ президенти Доналд Трамп 6 август куни CNN'га берган интервьюсида Россия президенти Владимир Путин билан келаси ҳафтада учрашиши мумкинлигини билдирди. Унинг айтишича, учрашувнинг асосий мавзуси Украинадаги урушни тўхтатиш бўлади. Бу ҳақда CNN нашри хабар қилган.
Трампга кўра, АҚШнинг махсус вакили Стив Виткоф яқинда Москвада Путин билан учрашган, музокаралар самарали кечган бўлсада, аниқ натижаларга олиб келмаган. АҚШ давлат котиби Марко Рубио эса бу учрашувдан сўнг Россиянинг тинчлик бўйича шартлари аниқроқ маълум бўлганини билдирган.
Учрашув таклифи Путиннинг ўзидан чиққан. У аввал Трамп, кейин Украина президенти Владимир Зеленский билан уч томонлама музокара ўтказишни таклиф қилган. Учрашув жойи ҳали белгиланмаган, аммо келаси бир-икки ҳафта ичида ўтказилиши режалаштирилмоқда.
Трамп, агар Россия урушни тугатиш бўйича келишувга рози бўлмаса, рус нефтини харид қилаётган давлатларга нисбатан 100 фоизлик иккиламчи санкциялар жорий этиш билан таҳдид қилмоқда. Айни вақтда эса Россия зарбалари Украина бўйлаб давом этмоқда. Сўнгги суткада камида 6 киши ҳалок бўлди, болалар жароҳатланди, юзлаб оилалар газсиз қолди.
