Тошкентдаги хусусий клиникада 8 ёшли боланинг вафот этгани бўйича жиноий иш очилди
Бош прокуратура ҳолат бўйича қўшимча маълумот берди.
Аввалроқ Тошкент шаҳридаги хусусий клиникалардан бирида 8 ёшли бола операция пайтида вафот этгани хабар қилинганди. Ҳолат юзасидан Бош прокуратура матбуот котиби Ҳаёт Шамсутдинов қўшимча маълумот тақдим этди.
Қайд этилишича, тиббиёт марказида 8 ёшли бола вафот этганлиги ҳолати юзасидан текшириш ҳаракатлари ўтказилган.
Ҳолатга алоқадор шахсларни батафсил сўроқ қилиш, юзлаштириш, қўп вақт талаб қилинадиган мураккаб экспертизалар тайинлаш ва бошқа бир қатор тергов ҳаракатларини ўтказмасдан қонуний тўхтамга келиш имкони йўқлиги сабабли Жиноят кодексининг 116-моддаси (Касб юзасидан ўз вазифаларини лозим даражада бажармаслик) билан жиноят иши қўзғатилган.
“Барча зарур тергов ҳаракатлари ўтказилганидан сўнг иш бўйича қонуний тўхтамга келинади”, дейилади расмий баёнотда.
