Франция мухолифати Макронни ҳокимиятдан четлатмоқчи
“France Unbowed” партияси 23-сентябр куни Макронни ҳокимиятдан четлатиш масаласини парламентга киритади.
Францияда чап қанот мухолифати Президент Эммануэл Макронни ҳокимиятдан четлатиш бўйича навбатдаги ташаббусни илгари сурмоқда. Бу ҳақда “France Insubordinate” (“France Unbowed”) партияси раҳбари Жан-Люк Меланшон France Inter радиоканали эфирида маълум қилди.
Меланшоннинг сўзларига кўра, партия 2025 йил 23 сентябр куни парламентга президентни ҳокимиятдан четлатиш масаласини киритмоқчи. Унга кўра, бу ташаббус ишончсизлик вотумига қўшимча сифатида кўриб чиқилади.
“Бир йил аввал биз президент истефоси масаласини кўтарган эдик. Энди эса 23 сентябрда бу масалани яна қайта кўтариб чиқамиз. Эҳтимол, ўша вақтга келиб ҳукумат аллақачон қулар, аммо биз Макронни ҳокимиятдан четлатишни таклиф қиламиз”, — деди Меланшон.
Маълумот учун, 2024 йилда “France Unbowed” партияси Макронга қарши импичмент жараёнини бошлаб, президентни лавозимидан озод этиш бўйича резолюция киритган эди. Бироқ Миллий ассамблея қонунчилик комиссияси резолюцияни рад этган (15 овоз ёқлаб, 54 овоз қарши).
