Афғонистонда тўй маросимларига қатъий чекловлар жорий этилди
Толибон раҳбари Хайбатуллоҳ Охундзода янги қоидаларни тасдиқлади.
Афғонистонда "Толибон" муваққат ҳукумати раҳбари Хайбатуллоҳ Охундзода янги фармон чиқарди. Унга кўра, анъанавий тўй маросимларининг қатор элементлари “исломий меъёрларга зид” ва “молиявий жиҳатдан оғир юк” сифатида баҳоланиб, қатъий чекловлар белгиланди.
Янги қоидаларга биноан, ҳаддан ташқари кўп қалин пули тўлаш, тўй олдидан ёки кейин зиёфатлар уюштириш, қимматбаҳо совғалар бериш, шунингдек, бир йил давомида бир мартадан кўпроқ совға улашиш тақиқланади. Давлатга тегишли транспорт воситаларидан тўйларда фойдаланиш ҳам бутунлай ман қилинди.
Фармонга кўра, "бодал" — қиз алмашиш орқали низоларни ҳал қилиш амалиёти, шунингдек, тўйларда ҳавога ўқ узиш, хавфли автомобиль ҳайдаш ва совға ютиш танловлари ҳам бекор қилинди. Келиннинг тўйидан кейинги "ронамой" совғалари ҳам энди берилмайди.
Толибон маъмурияти янги қоидалар орқали тўйларни камтарона, куёвнинг имкониятларига мос тарзда ўтказишни мақсад қилмоқда. Фармонда тўй маросимларини ортиқча дабдабасиз, фотиҳа ва никоҳдан кўп ўтмай ўтказиш мажбурийлиги ҳам таъкидланган.
