Қозоғистонда илмий-амалий конференция бўлиб ўтди
Турк Маданияти ва Мероси Фонди ҳамда Қозоғистоннинг Мангистау вилояти ҳокимлиги ҳамкорлигида Бекет Ата Мирзоқулулонинг 275 йиллигига бағишланган Халқаро илмий-амалий конференция ўз ишини бошлади.
Тадбирда Турк Маданияти ва Мероси Фонди номидан ташкилотнинг лойиҳа менеҗери Толқат Муханов иштирок этди. У фонд томонидан амалга оширилаётган маданий лойиҳалар, хусусан туркий халқларнинг умумий меросини ўрганиш ва тарғиб қилиш йўналишида қилинаётган ишлар ҳақида маълумот берди. Муханов Бекет Ата Мирзоқулуло меросининг туркий дунё маънавий бирлигида муҳим ўрин тутишини таъкидлади ҳамда бу мероснинг халқаро илмий жамоатчилик томонидан кенгроқ ўрганилиши аҳамиятли эканини қайд этди.
Тадбир “Ақтов – 2025 йил Туркий Дунёнинг Маданият Пойтахти” дастури доирасида бўлиб ўтмоқда. Конференцияда Бекет Атанинг бой маънавий-фалсафий мероси, унинг туркий дунё маданиятидаги ўрни, шунингдек, Оқланди ва Қадим Бейнеудаги муқаддас ерости масжидларининг сақланиши ва тарғиб қилиниши каби долзарб масалалар муҳокама қилинмоқда.
Конференция туркий давлатлар олимлари ва халқаро илмий марказлар вакиллари иштирокида илм-фан ва маданият соҳасида ҳамкорликни мустаҳкамлашга, шунингдек, Марказий Осиёнинг нойоб диний-меъморий меросини жаҳон миқёсида танитишга ҳисса қўшади.
Конференциянинг асосий илмий йўналишлари ерости масжидларнинг меъморий-тарихий аҳамияти ва уларнинг муҳофаза мақомини ўрганиш, шунингдек, замонавий реставрация, сақлаш ва туризм ёндашувларини қўллашга бағишланган. Ушбу мавзу доирасида олимлар ва мутахассислар ерости масжидларнинг диний-маданий меросдаги ролини, уларни асраш ва келажак авлодларга етказиш масалаларини муҳокама этишади.
Тадбир тематик бўлимлари икки асосий йўналишни қамраб олди. Биринчи бўлим: Тарихий-маданий мерос – Бекет Ата масжидларини сақлаш, реставрация қилиш ва тарғиб этиш, шунингдек, муқаддас туризм ва барқарор ривожланиш масалаларини илгари суради. Иккинчи бўлим: Тарих ва этнография – архив ва манбашунослик тадқиқотларига, маънавий мероснинг замонавий жамиятдаги ролини илмий таҳлил қилишга бағишланади.
Конференцияда Қозоғистон, Озарбайжон, Туркия, Туркманистон, Ўзбекистон, Бошқирдистондан келган университет ўқитувчилари, таниқли олимлар, археология, меъморчилик, реставрация, музейшунослик, дин тарихи ва этнография бўйича мутахассислар ҳамда халқаро илмий-тадқиқот марказлари вакиллари иштирок этмоқда.
Конференция нафақат илмий мулоқотни кучайтиради, балки туркий дунёнинг умумий маданий меросини асраш ва уни халқаро миқёсда тарғиб қилишга муҳим ҳисса қўшадиган платформага айланади.
