Эрондаги норозилик намойишларида камида 5000 киши ҳалок бўлган — Эрон расмийлари
Вафот этганлар орасида тахминан 500 нафар хавфсизлик хизмати ходими бор.
Эрон расмийларига кўра, мамлакат бўйлаб оммавий норозилик намойишлари давомида камида 5000 киши ҳалок бўлган. Исми ошкор қилинмаслиги шарти билан гапирган Эрон ҳукумати расмийси Reuters агентлигига берган интервьюсида, ўлимлар орасида тахминан 500 нафар хавфсизлик хизмати ходими борлигини таъкидлади. Расмий “бегуноҳ эронликлар”нинг ўлими учун “террорчилар ва қуролли қўзғолончилар”ни айблади. Бу ҳақда dw.com нашри хабар берди.
Декабрь охирида бошланган намойишлар энг шиддатли тўқнашувлар ва энг кўп ўлимлар шимоли-ғарбий курд ҳудудларида қайд этилган. Эрон раҳбарлари тартибсизликлар учун ташқи душманлар ва чет элдаги қуролли гуруҳларни мунтазам айблайди.
Бошқа манбалар, хусусан инсон ҳуқуқлари ташкилотлари эса бошқа рақамларни эълон қилмоқда. АҚШда жойлашган HRANA ташкилоти 3308 дан 4382 нафаргача ҳалок бўлганини хабар қилган. Уларнинг маълумотларига кўра, 24 000 дан ортиқ одам ҳибсга олинган. Норвегияда жойлашган Ҳенгав ташкилоти ҳам шиддатли тўқнашувлар Эроннинг курд ҳудудларида содир бўлганини билдирган.
