Франция Трампнинг Ғазо тинчлик кенгашига қўшилиш таклифини рад этди
"Мен француз виноларига бож жорий қиламан, шунда Макрон Тинчлик кенгашига қўшилишга рози бўлади", - дея жавобан таҳдид қилди Трамп.
Франция Президенти Эммануэл Макрон Дональд Трампнинг Ғазо тинчлик кенгашига қўшилиш таклифини рад этишга қарор қилди. Bloomberg агентлиги манбаларига таяниб хабар беришича, Париж ҳозирги босқичда ушбу ташаббусга қўшилмаслик ниятида.
16 январь куни Оқ уй Трампнинг Исроил ва Фаластиннинг Ҳамас гуруҳи ўртасидаги Ғазодаги низони якунлаш ва анклавни тиклаш бўйича Тинчлик кенгаши ташкил этилганини эълон қилган эди. Макроннинг қарорига кўра, кенгаш низоми БМТнинг амалдаги тамойиллари ва институционал тузилишига зид бўлиб, Франция учун жиддий хавотирлар туғдиради.
Франция ҳукумати Трамп ташаббуси билан тузилган форумга ҳозирча қўшилмаслик ниятида эканини Reuters агентлиги тасдиқлади ва бу қарор БМТнинг қонунийлиги ва ролини ҳимоя қилишга қаратилган, дея таъкидлади.
Bloomberg агентлигининг хабар беришича, АҚШ президенти Доналд Трамп Франция президенти Эммануэл Макроннинг Ғазо тинчлик кенгашига қўшилиш таклифини рад этгани муносабати билан танқидий баёнот берди.
АҚШ президенти журналистларга берган изоҳида Макроннинг лавозим муддати яқин орада тугашини таъкидлаб, Франция винолари ва шампанларига 200 фоизлик бож жорий қилинишини эълон қилди. Шунингдек, Трамп баёнотида, агар Макрон кенгашга қўшилса, бу тарифлар кучга кириши мумкинлиги таъкидланди.
Агентлик хабарига кўра, Эммануэл Макроннинг иккинчи президентлик муддати 2027 йилда якунланади ва у кейинги сайловларда иштирок этмаслигини маълум қилган. Баёнотлар Трампнинг АҚШ томонидан тузилган Ғазо тинчлик кенгашида Франция иштирок этишига қарши муносабати сифатида талқин қилинмоқда.
Аввалроқ Трамп Ўзбекистонни Ғазо бўйича Тинчлик кенгашига таъсисчи аъзо сифатида таклиф қилгани,Президент Шавкат Мирзиёев Ўзбекистоннинг Ғазо бўйича халқаро тинчлик ташаббусида иштирок этишга тайёрлигини билдиргани хабар берилган эди.
Шунингдек Қозоғистон президенти Қосим-Жомарт Тоқаев ҳам Трампнинг Ғазо тинчлик кенгашига қўшилиш таклифига рози бўлган эди. Россия Президенти Владимир Путин ҳам Трампнинг ташаббуси доирасида қўшилиш таклифини олгани хабар қилинган эди.
