Россия президенти Владимир Путин АҚШ ташаббуси билан тузилаётган Ғазо бўйича халқаро “Тинчлик кенгаши”га қўшилиш таклифини олди. Бу ҳақда Россия президенти матбуот котиби Дмитрий Песков журналистларга маълум қилди деб хабар берди РБС.
Унинг сўзларига кўра, таклиф дипломатик каналлар орқали етказилган ва ҳозирда Россия томони ушбу ташаббуснинг барча тафсилотларини ўрганмоқда. Шунингдек, Москва таклиф билан боғлиқ барча нуансларни аниқлаштириш мақсадида Америка томони билан алоқалар ўрнатишга умид қилмоқда.
Маълумот учун, Дональд Трамп 2026 йил 16 январда Ғазо Тинчлик Кенгаши ташкил этилганини эълон қилган. Ушбу тузилма Ғазо сектори бўйича тинчлик режасининг бир қисми бўлиб, минтақада барқарорликни таъминлаш, тинчликни мустаҳкамлаш ва можаролар хавфи мавжуд ҳудудларда қонуний бошқарувни тиклашни мақсад қилган.
Кенгашнинг ижроия қўмитаси таркибига АҚШ Давлат котиби Марко Рубио, АҚШ президентининг махсус вакили Стив Виткофф, Жаред Кушнер ҳамда Буюк Британиянинг собиқ бош вазири Тони Блер киритилган.
Bloomberg агентлиги хабарига кўра, АҚШ расмийлари Кенгашга доимий аъзо бўлишни истаган давлатлардан камида 1 миллиард доллар миқдорида молиявий ҳисса киритишни сўрамоқда. Тинчлик Кенгашига қабул қилиш ва унинг фаолиятига оид якуний қарорлар АҚШ президенти томонидан тасдиқланади.
Аввалроқ, Қозоғистон президенти Қосим-Жомарт Тоқаев ҳам ушбу Тинчлик Кенгашига қўшилиш таклифини олган ва Қозоғистон ташкилотнинг таъсисчи аъзолари қаторига қўшилишига розилик билдирган эди.