Европа Иттифоқи Эронга қарши янги санкциялар пакетини тайёрламоқда

 

Европа Иттифоқи Эронга қарши янги экспорт ва технологик санкциялар пакетини тайёрламоқда. Бу ҳақда Европа Иттифоқи ташқи ишлар ва хавфсизлик сиёсати бўйича олий вакили Кажа Каллас Страсбургда Европа Парламентида Эрондаги вазият юзасидан ўтказилган эшитувида маълум қилди дейди ТАСС.

 

Унинг таъкидлашича, янги чекловлар Теҳронга ракета ва учувчисиз учиш аппаратлари (дронлар) ишлаб чиқаришда қўлланиладиган компонентларни етказиб беришга қаратилади. Шунингдек, санкциялар Эронда ҳукуматга қарши норозилик намойишларининг шафқатсизларча бостирилишига жавобан таклиф этилмоқда.

 

“Биз норозилик намойишларини куч билан бостиргани учун Эронга қарши янги санкциялар киритишни, шунингдек, ракета ва дронлар ишлаб чиқаришда фойдаланиладиган технологиялар экспортига қўшимча чекловлар жорий этишни таклиф қилмоқдамиз”, — деди Кажа Каллас.

 

У, шунингдек, Европа Комиссияси ва Европа Иттифоқининг дипломатик хизмати ҳукуматга қарши норозиликларда қатнашаётган, қонуний талаблар билан чиққан Эрон фуқароларини қўллаб-қувватлашини билдирди.

 

Европа Комиссияси президенти Урсула фон дер Ляен ҳам Эрон расмийларига нисбатан янги санкциялар тайёрланаётганини тасдиқлади. Унинг қайд этишича, Европа Иттифоқи Эронни инсон ҳуқуқларини бузиш, ядровий дастурини ривожлантириш ҳамда Украинага қарши урушда Россияни қўллаб-қувватлагани учун аллақачон бир қатор чекловлар билан жазолаган.

 

“Сўнгги ҳафталарда Эронда норозилик намойишлари шафқатсизларча бостирилди. Европа Иттифоқи ўз эркинлиги учун курашаётган жасур эронлик аёллар ва эркаклар билан бирдам”, — деди фон дер Ляен.

 

Шу билан бирга, Европа Иттифоқи мамлакатлари Эрон Ислом инқилоби қўриқчилари корпусини (ИРГС) террорчи ташкилот деб эълон қилиш масаласини ҳам муҳокама қилмоқда. Янги санкциялар бўйича қарорлар аъзо давлатлар томонидан бир овоздан қабул қилиниши лозим.