АҚШдан 40 дан ортиқ ўзбекистонлик депортация қилинди
21 январ куни АҚШдан Ўзбекистонга чартер рейс амалга оширилди
АҚШда қолиш учун қонуний асослари бўлмаган 40 нафардан ортиқ Ўзбекистон фуқароси депортация қилинди. Бу ҳақда Ўзбекистон Республикаси Ташқи ишлар вазирлиги матбуот хизмати маълум қилди.
Маълумотларга кўра, депортация жараёни доирасида ташкил этилган чартер рейс 21 январ куни амалга оширилган. Ушбу рейс орқали 44 нафар Ўзбекистон фуқароси Ўзбекистонга қайтарилди.
Парвоз АҚШнинг тегишли ҳукумат идоралари билан ҳамкорликда ташкил этилиб, фуқароларнинг хавфсиз ва ўз вақтида ватанга қайтиши таъминланди.
Ташқи ишлар вазирлиги мазкур тадбир Ўзбекистон ва АҚШ ўртасидаги ҳамкорликнинг муҳим намунаси эканини таъкидлади. Хорижда бўлиб турган Ўзбекистон фуқароларининг ҳуқуқ ва манфаатларини ҳимоя қилиш, уларнинг хавфсизлигини таъминлаш ҳамда зарур ҳолларда ватанга қайтариш бўйича ишлар изчил давом эттирилмоқда.
