БААда АҚШ, Украина ва Россия ўртасида музоракаралар ўтказилади
Учрашув “техник даражада” ўтказилиши маълум қилинди.
Россия, Украина ва Қўшма Штатлар вакиллари ўртасида уч томонлама учрашув ўтказилиши режалаштирилмоқда. Музокаралар 23–24 январ кунлари Бирлашган Араб Амирликларида бўлиб ўтади ва “техник даражада” ташкил этилиши маълум қилинди. Бу ҳақда dw.com нашри хабар берди.
Мазкур учрашув Давос шаҳрида ўтаётган Жаҳон иқтисодий форуми доирасида ўтказилган бир қатор муҳим ва кескин учрашувлардан сўнг режалаштирилган. Хусусан, 22 январ куни тушдан кейин АҚШ президенти Доналд Трамп ва Украина президенти Владимир Зеленский ўртасида узоқ кутилган музокаралар бўлиб ўтди. Томонлар қарийб бир соат давомида суҳбатлашган.
Учрашув якунида Доналд Трамп музокараларни «яхши» деб баҳолаб, “барча томонлар урушнинг якунланишини истаётганини” таъкидлаган. Бироқ Ғарб оммавий ахборот воситалари ушбу учрашув натижаларига эҳтиёткорона муносабат билдирган. Хусусан, Финансиал Тимес нашрининг ёзишича, Украина томони аниқ хавфсизлик кафолатлари ва урушдан кейинги қайта қуриш бўйича мажбуриятларга эриша олмаган. Аввал келишилган ҳужжатлар эса имзоланмаган.
Шундан сўнг Владимир Зеленский форум минбаридан нутқ сўзлаб, Европа давлатларини ички келишмовчиликлар сабаб қатъий позиция йўқлигида танқид қилди. У Европа ҳануз ўзини мустақил глобал куч сифатида намоён эта олмаётганини қайд этди.
Зеленский, шунингдек, Трамп илгари сурган “Тинчлик Кенгаши” ташаббусини танқид қилиб, Европа давлатлари мазкур масалада ягона ёндашувга эга эмаслигини билдирди. Украина раҳбари Россия нефтини ноқонуний ташиётган “соя флоти”га қарши кескин чоралар кўришга ва Эрон масаласига ҳам жиддий эътибор қаратишга чақирди.
Музокараларнинг навбатдаги босқичи сифатида БААда бўлиб ўтадиган учрашувда уч мамлакат делегациялари икки кун давомида эҳтимолий муросанинг техник жиҳатларини муҳокама қилиши кутилмоқда.
