Россияда мигрантлар учун иш турлари бўйича чекловлар кучайтирилди
Янги чекловлар транспорт, савдо, таълим ва курьерлик соҳаларини қамраб олади.
Россиянинг Самара вилоятида мигрантлар учун фаолият турлари бўйича чекловлар кучайтирилди. Вилоят губернатори Вячеслав Федоришчев имзолаган фармонга мувофиқ, 2026 йилда патент асосида ишлаётган хорижий фуқароларнинг айрим соҳаларда фаолият юритиши уч ой муддатга тақиқланади. Бу ҳақда ТАСС ахборот агентлиги хабар берди.
Фармонда таъкидланишича, қарор вилоятда фуқароларнинг хавфсизлигини таъминлаш ҳамда меҳнат бозорини ҳимоя қилиш мақсадида қабул қилинган. Ҳужжатга кўра, Самара вилоятида фаолият юритаётган тадбиркорлик субъектларига айрим иқтисодий йўналишларда хорижий фуқароларни ишга жалб этиш тақиқланади.
Хусусан, мигрантларга курьерлик, савдо ва умумий овқатланиш соҳаларида ишлаш, шунингдек, сотувчи сифатида фаолият юритиш чекланади. Бундан ташқари, шаҳар ва шаҳар атрофи транспортида мунтазам йўловчи ташиш, шунингдек, шаҳарлараро автобусларни бошқариш ҳам хорижий ишчилар учун тақиқланади.
Чекловлар таълим соҳасига ҳам тааллуқли бўлиб, мигрантлар мактаб ва мактабгача таълим муассасаларида ишлаши, болаларга таълим бериши ёки тарбиячи сифатида фаолият юритиши мумкин эмас.
Шунингдек, хорижий фуқароларга ходимларни ёллаш, ишга жойлаштириш билан боғлиқ фаолият, маълумотлар ва маълумотлар базаларини қайта ишлаш ҳамда жойлаштириш соҳаларида ишлаш тақиқланади.
Натижада Самара вилоятида мигрантларнинг ишлаши тақиқланган фаолият турлари рўйхати сезиларли даражада кенгайтирилди.
