“Nipah” вирусига қарши вакцина ишлаб чиқарилди
Вакцинанинг илк клиник синовлари Бельгияда ўтказилади.
Токио университети олимлари томонидан Nipah вирусига қарши ишлаб чиқилган вакцинанинг илк клиник синовлари Бельгияда бошланади. Бу ҳақда Nikkei нашри хабар берди.
Маълум қилинишича, вакцина аввал приматлар устида синовдан ўтказилган ва тўлиқ ҳимоя самарадорлигини кўрсатган. Клиник синовлар одамларда ўтказилиши режалаштирилган. Келгуси йилда тадқиқотлар Бангладешда кенгайтирилиб, унда катталар ва болалар ҳам иштирок этиши кўзда тутилмоқда.
Nipah вируси одамларга асосан кўршапалаклар ва чўчқалар каби ҳайвонлардан юқади. Вирус нафас олиш тизими ва марказий асаб тизимини зарарлаб, энцефалит (мия яллиғланиши)ни келтириб чиқаради. Ўз вақтида даволанмаса, касаллик 75 фоиз ҳолатда ўлим билан якунланиши мумкин.
Касаллик аломатлари инфекциядан 4–7 кун ўтиб намоён бўлади. Январь ойида Ҳиндистоннинг Калкутта шаҳри яқинида Нипаҳ вируси тарқалиши қайд этилган бўлиб, ҳозиргача беш киши касалланган, 100 га яқин шахс карантинга олинган.
Ҳозирга қадар Nipah вирусига қарши тасдиқланган даволаш усули ёки вакцина мавжуд эмас. Бельгияда бошланаётган клиник синовлар ушбу йўналишда муҳим қадам сифатида баҳоланмоқда.
