Путин энергетика сулҳи бўйича ваъдасини бажарди — Трамп
Россия бир ҳафта давомида энергетика объектларига зарба бермаган, сулҳ муддати тугагач, ҳарбий ҳужумлар қайта бошланган.
АҚШ президенти Доналд Трамп Россия президенти Владимир Путин Украинага қарши энергетика инфратузилмасига ҳужумларни вақтинча тўхтатиш бўйича берган ваъдасига амал қилганини маълум қилди. Бу ҳақда dw.com нашри хабар берди.
Оқ уйда журналистлар билан мулоқот чоғида Трампнинг айтишича, мазкур пауза бир ҳафта — якшанбадан якшанбагача давом этган.
“У бу борада ўз сўзида турди. Бу жуда муҳим эди. Бир ҳафта ўтгач, биз исталган муддатга келишишга тайёр бўлардик”, — деди АҚШ президенти.
Трампнинг таъкидлашича, ушбу муддат тугагач, Россия яна ҳарбий ҳаракатларни кучайтирган. “Пауза якунланди ва Путин энди зарбаларни давом эттирди”, — дея қўшимча қилди у.
Аввалроқ, 29 январь куни Доналд Трамп шахсан Владимир Путинга кучли совуқ сабабли Украинадаги энергетика объектларига ҳужумларни вақтинча тўхтатиш илтимоси билан мурожаат қилганини билдирган эди. Кейинчалик Россия президенти матбуот котиби Дмитрий Песков бу ташаббус музокаралар учун шароит яратиш мақсадида илгари сурилганини тасдиқлади.
3 февраль куни Россия Мудофаа вазирлиги Украина ҳарбий-саноат комплекси ва энергетика инфратузилмасига кенг кўламли зарбалар берилганини маълум қилди. Вазирлик ушбу ҳужумлар Россия ҳудудларига қилинган аввалги зарбаларга жавоб эканини таъкидлади.
Украина президенти Владимир Зеленский эса Россия Трампнинг илтимосини эътиборсиз қолдирганини айтиб, АҚШдан вазиятга расмий муносабат билдиришни кутаётганини маълум қилди.
