Эронда Нобел мукофоти совриндори 7,5 йилга қамалди
Шунингдек, унга 2 йил давомида мамлакатдан чиқиш ҳам таъқиқланган.
Эронлик Нобел тинчлик мукофоти совриндори, инсон ҳуқуқлари фаоли Наргес Моҳаммади яна узоқ муддатга озодликдан маҳрум этилди. Маълумотларга кўра, 53 ёшли ҳуқуқ ҳимоячисига нисбатан янги ҳукм Машҳад шаҳридаги суд томонидан чиқарилган. Бу ҳақда The Guardian нашри хабар берди.
Фаолнинг адвокати Мустафо Нилининг маълум қилишича, Моҳаммади “ахборот тўплаш ва давлатга қарши фитна” айблови билан 6 йилга, шунингдек, тарғибот фаолияти учун яна 1,5 йилга озодликдан маҳрум қилинган. Бундан ташқари, унга нисбатан 2 йил давомида мамлакатдан чиқиш тақиқи ҳам қўлланган.
Шунингдек, у Теҳрондан узоқда жойлашган ҳудудда қўшимча ички сургун чораларига ҳам дуч келгани айтилмоқда. Эрон расмийлари ушбу ҳукм юзасидан ҳозирча расмий изоҳ бермаган.
Наргес Моҳаммади 2023 йилда Эронда аёллар ҳуқуқлари ва инсон эркинликлари учун олиб борган фаолияти учун Нобел тинчлик мукофотига сазовор бўлган эди.
