Қирғизистонда муддатидан олдин президент сайловларини ўтказиш таклиф қилинди

 

Қирғизистонда бир гуруҳ жамоат ва сиёсий арбоблар жорий йилда муддатидан олдин президентлик сайловларини ўтказиш ташаббуси билан чиқди. Тегишли мурожаат давлат раҳбари ҳамда Жогорку Кенеш спикерига йўлланган бўлиб, ҳужжатни 75 нафар шахс — собиқ бош вазирлар, парламент аъзолари, олимлар ҳамда маданият соҳаси вакиллари имзолаган. Бу ҳақда Kaktus media нашри хабар берди.

 

Ташаббус муаллифлари президентлик ваколат муддати билан боғлиқ ҳуқуқий масалалар юзасидан жамиятда турли талқинлар мавжудлигини таъкидлаб, сиёсий барқарорликни таъминлаш ҳамда ижтимоий бўлинишларнинг олдини олиш мақсадида сайловларни имкон қадар тезроқ ўтказишни таклиф этган.

 

Уларнинг фикрича, Конституцияга киритилган ўзгартишлардан сўнг президентлик муддати бўйича ҳуқуқий ноаниқлик юзага келган. Айрим ҳуқуқшунослар амалдаги раҳбар олти йиллик муддатни якунлаши кераклигини айтса, бошқалар беш йиллик янги тизимга ўтишни маъқул деб ҳисобламоқда.

 

Шунингдек, мурожаатда сўнгги йилларда мамлакатда қатор ижобий ўзгаришлар амалга оширилгани қайд этилган. Жумладан, қўшни давлатлар билан чегаравий масалаларни ҳал қилиш, армия салоҳиятини ошириш ҳамда коррупцияга қарши кураш доирасида буджет тушумларини кўпайтириш борасида натижаларга эришилгани таъкидланган.

 

Бироқ ташаббускорлар мамлакат олдида ҳали ҳам муҳим муаммолар мавжудлигини билдирган. Хусусан, давлат қарзининг ортиб бораётгани, қашшоқлик даражаси ҳамда ёшларнинг хорижга чиқиб кетиши масалалари долзарб бўлиб қолмоқда.

 

Президент маъмурияти мазкур мурожаат юзасидан ҳозирча расмий изоҳ бермаган.