Президент Шавкат Мирзиёев Каллибек Камалов вафоти муносабати билан ҳамдардлик билдирди
“Атоқли давлат ва жамоат арбоби, ёшларнинг меҳрибон устози, самимий ва камтарин инсон Каллибек Камаловнинг хотираси қалбларимизда доимо сақланиб қолади”, дейилади ҳамдарликда.
Президент Шавкат Мирзиёев Ўзбекистоннинг атоқли давлат ва жамоат арбоби, меҳнат фахрийси Каллибек Камаловнинг вафоти муносабати билан чуқур ҳамдардлик билдирди. Каллибек Камалов 11 февраль куни 100 ёшида оламдан ўтди.
Каллибек Камалов 1926 йил 18 мартда Қорақалпоғистоннинг Тахтакўпир туманида туғилиб, меҳнат фаолиятини ёшлар қўмитаси котиби лавозимидан бошлаган. Кейинчалик Вазирлар Кенгаши раисининг ўринбосари, Нукус шаҳар ижроия қўмитаси раиси, Қорақалпоғистон Республикаси коммунал хўжалиги ва йўл транспорти вазири, Қорақалпоғистон партия қўмитаси котиби лавозимларида самарали фаолият олиб борган.
1959–1963 йилларда Қорақалпоғистон Республикаси Вазирлар Кенгаши раиси, 1963–1984 йилларда эса партия қўмитасининг биринчи котиби сифатида ҳудудни ижтимоий-иқтисодий ривожлантириш ва соҳаларни замон талаблари асосида йўлга қўйиш бўйича улкан ишларни амалга оширган. 1984–1986 йилларда эса дипломат сифатида самарали фаолият кўрсатган.
Унинг раҳбарлиги ва фидойилиги натижасида пахтачилик, ғаллачилик, чорвачилик, саноат ва ишлаб чиқариш тармоқлари ривожланиб, аҳолининг турмуш даражаси яхшиланди. Сўнгги йилларда K.Kamalov нуронийлар жамоатчилик кенгаши раиси сифатида кексаларни қўллаб-қувватлаш, ёшларни Ватанга муҳаббат ва миллий қадриятларга ҳурмат руҳида тарбиялаш борасида фаол ишлаган.
Каллибек Камалов “Шуҳрат” медали ва “Эл-юрт ҳурмати” ордени билан тақдирланган. Унинг хотираси қалбларимизда доимо сақланиб қолади.
