Қорақалпоғистоннинг собиқ раҳбари Каллибек Камалов вафот этди
Унинг 100 йиллик юбилейига бир ойдан сал кўпроқ вақт қолганди.
Қорақалпоғистонда собиқ давлат арбоби, узоқ йиллар республика бошқарувида фаолият юритган Каллибек Камалов вафот этди. Сиёсатчи 100 ёшга тўлишидан бир ой олдин ҳаётдан кўз юмди.
Каллибек Камалов 1963 йилдан 1984 йилгача Ўзбекистон ССР Коммунистик партияси Қорақалпоғистон вилоят қўмитасининг биринчи котиби бўлиб ишлаган. Унинг фаолияти коммунал хизмат вазирлигидан тортиб, Қорақалпоғистон АССР Вазирлар Кенгаши раисигача бўлган турли давлат лавозимларини қамраб олган. Республикадаги фаолиятини якунлагач, у Руминиянинг Констанса шаҳрида СССР бош консули лавозимида хизмат қилган.
Собиқ сиёсатчининг таржимаи ҳоли шов-шувли суд жараёни билан ҳам эсда қолган: 1987 йилда у “пахта иши” бўйича судланувчи сифатида қатнашган, 1989 йилда 15 йилга озодликдан маҳрум этилган ва Социалистик Меҳнат Қаҳрамони унвони ҳамда бошқа давлат мукофотларидан маҳрум қилинган. Кейинчалик у афв этилган.
Каллибек Камалов 1926 йил 18 мартда туғилган ва фаолиятини қишлоқ ўқитувчиси сифатида бошлаган. Унинг ўғли Мурат Камалов 2020–2022 йилларда Қорақалпоғистон парламенти (Жўқорғи Кенес) раиси лавозимида ишлаган.
