АҚШ Суриядан барча қўшинларини олиб чиқишини маълум қилди

 

 

АҚШ Суриядаги ҳарбий қўшинини тўлиқ олиб чиқиш тўғрисида қарор қабул қилди ва шу орқали мамлакат ҳудудида қарийб ўн йил давом этган миссиясига якун ясамоқда. Бу ҳақда The Wall Street Journal манбаларга таяниб хабар берди.

 

Нашр маълумотларига кўра, Қўшма Штатлар Сурияда жойлашган тахминан минг нафар ҳарбий хизматчисини босқичма-босқич олиб чиқишни режалаштирган. Таъкидланишича, ушбу қарор АҚШ ва Эрон ўртасидаги кескинлик билан бевосита боғлиқ эмас.

 

Америкалик расмийлар баёнотига кўра, Оқ уй ҳозирги шароитда АҚШнинг Суриядаги ҳарбий иштирокини зарур деб ҳисобламаяпти. Қарор, шунингдек, асосан курд кучларидан иборат ва АҚШ томонидан қўллаб-қувватланган Сурия Демократик Кучлари (СДК)ни ҳукумат армияси таркибига босқичма-босқич қўшиш жараёнлари билан ҳам изоҳланмоқда.

 

Бундан ташқари, қўшинларни олиб чиқишнинг яна бир сабаби сифатида Сурия ҳукумат кучлари билан эҳтимолий тўқнашув хавфини камайтириш зарурати кўрсатилган. АҚШ маъмуриятидаги юқори лавозимли манбаларга кўра, Дамашқ расмийлари аксилтеррор операцияларида етакчи ролни ўз зиммасига олаётгани фонида ҳарбий миссиянинг долзарблиги қайта кўриб чиқилган.

 

Маълум қилинишича, Суриядаги Америка ҳарбий контингентининг асосий вазифаси ИШИД таҳдидига қарши курашдан иборат бўлган. АҚШ кучларининг катта қисми мамлакатнинг шимоли-шарқида СДК билан ҳамкорликда, яна бир қисми эса Ал-Танф ҳарбий базаси ҳудудида жойлаштирилган эди.

 

Хабарларга кўра, АҚШ ҳарбий иштирокининг қисқариши айрим халқаро ва америкалик расмийларда хавотир уйғотган. Уларнинг фикрича, бу ҳолат Дамашқ ва СДК ўртасидаги келишувларнинг заифлашишига ҳамда террорчилик таҳдидларининг қайта фаоллашишига замин яратиши мумкин.