АҚШ Ўзбекистондаги айрим шахсларга виза чекловлари жорий этди
Чекловлар икки виза расмийлаштириш компаниясининг раҳбарлари ва юқори лавозимли ходимларига нисбатан қўлланиб, улар ноқонуний миграцияни мувофиқлаштиришда гумон қилинмоқда.
АҚШ Давлат департаменти Ўзбекистон ҳудудида ноқонуний иммиграцияни ташкил қилган шахсларга нисбатан виза чекловларини жорий қилди. Мазкур чоралар Ўзбекистонда фаолият юритувчи иккита виза расмийлаштириш компаниясининг раҳбарлари ва юқори лавозимли мансабдор шахсларига нисбатан қўлланилган. Бу ҳақда АҚШ Давлат департаменти хабар берди.
Маълумотларга кўра, ушбу шахслар АҚШга ноқонуний иммиграция қилишни режалаштирган хорижий фуқароларга, жумладан вояга етмаганларга, сафар хизматларини ташкил этишда ёрдам берган.
Тергов натижаларига кўра, Ўзбекистондаги айрим шахслар ноқонуний иммиграцияни режалаштирган шахслар учун транспорт ва транзит йўналишларини мувофиқлаштирган. Улар аэропортлар орқали ва давлатлараро чегаралар орқали Марказий Америкадаги транзит нуқталаргача етиб боришган, кейинчалик ушбу шахсларнинг аксарияти АҚШ ҳудудига ноқонуний киришга уриниш чоғида қўлга олинган.
Мазкур чекловлар АҚШнинг Иммиграция ва фуқаролик тўғрисидаги қонунининг 212(а)(3)(С)-моддасига мувофиқ қўлланилиб, ушбу норма АҚШ ташқи сиёсати манфаатларига жиддий салбий таъсир кўрсатиши мумкин бўлган шахсларнинг мамлакатга киришини тақиқлашни назарда тутади.
АҚШ томони миллий хавфсизлик ва иммиграция қонунчилигини бузишга қаратилган ҳар қандай уринишларга муросасиз муносабат билдиришини таъкидлади. Шунингдек, ноқонуний миграциядан фойда кўрувчи шахслар ва тармоқларга нисбатан қатъий чоралар кўрилиши, одам савдоси ва ноқонуний ташиш билан боғлиқ тармоқларга қарши кураш изчил давом эттирилиши қайд этилди.
Баёнотда АҚШ ҳукумати Ўзбекистон билан яқиндан ҳамкорликни юқори баҳолаган, жиноий тармоқлар фаолиятини аниқлаш ва уларга чек қўйиш борасидаги ҳамкорликнинг давом этишини таъкидлади.
