Ўзбекистонда ёш оилаларга уй-жой ипотекаси бўйича имтиёзлар берилади
Кредит ставкасининг 14 фоиздан ошган қисми бюджетдан қоплаб берилади.
Ўзбекистонда ёш оилаларни қўллаб-қувватлаш мақсадида уй-жой ипотека дастури доирасида кредит ставкасининг 14 фоиздан ошган қисми бюджетдан қоплаб берилади. Бу ҳақда 24 февраль куни Президент Шавкат Мирзиёевнинг ёшлар билан мулоқотида маълум қилинди.
Давлат раҳбари таъкидлашича, ҳар йили республикада 270 мингга яқин янги оила шаклланади ва уларга қулай ҳамда шинам уй-жой зарур. Шу боис, ёш оилаларга имтиёзли ипотека кредитлари ажратилади.
Бундан ташқари, ёшлар ўртасида китобхонликни ривожлантириш мақсадида “Китобхонлик маданиятини ривожлантириш” жамғармаси орқали энг истеъдодли ёзувчиларга ижодий буюртма берилади ва бир йил давомида ойига 20 миллион сўмдан ҳақ тўланади.
Энг сара хорижий адабиётларни ўзбек тилига, миллий адабиётларни хорижий тилларга таржима қилиш ва чоп этиш харажатининг ярми қопланади.
Мутасаддиларга янги ўқув йилигача энг яхши 100 та асардан иборат китоблар тўпламини тайёрлаб, барча мактаб ва техникумларга етказиш топширилди. Мактаблардаги энг фаол китобхон ўқувчиларга 10 миллион сўмдан мукофот берилади.
Китоб савдосини ойига 10 минг донадан оширган тадбиркорларга уч йилга 1 миллиард сўмгача 7 фоизли ссуда берилади.
