Ўзбекистондаги нуфузли банкнинг мансабдор ходими қамоққа олинди
У Тошкент вилоятида аниқланган қарийб 73 миллиард сўмлик солиқ қарзини “бартараф қилиб бериш” эвазига ишлаб чиқариш билан шуғулланувчи МЧЖдан 110 минг доллар талаб қилган.
Етакчи тижорат банкларидан бирининг Амалиёт бошқармаси бошлиғи ўринбосарига нисбатан жиноят иши қўзғатилди. Бу ҳақда ДХХ Zamon.uz'га хабар берди.
Аниқланишича, ушбу мансабдор шахс Тошкент вилоятида қурилиш материаллари ишлаб чиқариш билан шуғулланувчи МЧЖда вилоят Солиқ бошқармаси томонидан ўтказилган аудит текшируви якунида аниқланган 72 миллиард 956 миллион сўмлик солиқ ва бошқа мажбурий тўловларни юқори лавозимда ишловчи танишлари орқали бартараф қилиб бериш эвазига 110 минг АҚШ доллари пул талаб қилган.
Давлат хавфсизлик хизмати, Иқтисодий жиноятларга қарши курашиш департаменти ҳамда ички ишлар органлари ҳамкорлигида ўтказилган тезкор тадбир давомида банк мансабдор шахси келишилган пул маблағининг бир қисми — 30 минг АҚШ долларини олган вақтида ашёвий далиллар билан қўлга олинган.
Мазкур ҳолат юзасидан унга нисбатан Жиноят кодексининг 168-моддаси 4-қисми «а» банди ҳамда 28, 211-моддаси 3-қисми «а» банди билан жиноят иши қўзғатилиб, «қамоқ» эҳтиёт чораси қўлланилган.
Ҳозирги вақтда мазкур ҳолат бўйича тергов ҳаракатлари олиб борилмоқда.
