“YEROSTIGAZ” АЖ томонидан корхонадан асоссиз 2,8 млрд сўм маблағ олингани аниқланди

 

Рақобат қўмитаси томонидан амалга оширилган ўрганишлар натижасида “YEROSTIGAZ” АЖ томонидан асоссиз равишда олинган қарийб 2,8 млрд сўм миқдоридаги пул маблағларини якуний истеъмолчига қайта ҳисоб-китоб қилиш белгиланди.

 

Рақобат қўмитасининг Тошкент вилояти ҳудудий бошқармаси томонидан Ангрен шаҳрида фаолият юритувчи “ANGREN ISSIQLIK ELEKTR STANSIYASI” АЖнинг мурожаати ўрганиб чиқилган.

 

Ўтказилган таҳлил ва ўрганишлар давомида “YEROSTIGAZ” АЖ томонидан “ANGREN ISSIQLIK ELEKTR STANSIYASI” АЖга етказиб берилган газ учун 2024 йил февраль ойида амалда бўлиши лозим бўлган 135 969 сўм тариф нархи ўрнига белгиланган тартибда декларация қилинмасдан оширилган 265 536 сўм тариф қўллангани аниқланган. Натижада 1,8 млрд сўмдан ортиқ, шунингдек март ойида 12 кун давомида қарийб 1 млрд сўм миқдорида, жами ҳисобда қарийб 2,8 млрд сўм асоссиз пул маблағлари олинганлиги маълум бўлди.

 

Мазкур ҳолат юзасидан ҳудудий бошқарма Махсус комиссияси томонидан“YEROSTIGAZ” АЖга нисбатан Ўзбекистон Республикасининг “Рақобат тўғрисида”ги Қонуни ҳамда Вазирлар Маҳкамасининг 239-сон қарори билан тасдиқланган низом талаблари бузилиши аломатлари билан иш қўзғатилди. Кўриб чиқиш якунига кўра, молиявий жарима қўллаш тўғрисида қарор қабул қилинди.

 

Шунингдек, аниқланган қонунбузилиш ҳолатларини бартараф этиш, келгусида бундай ҳолатларга йўл қўймаслик ҳамда асоссиз ҳисобланган қарийб 2,8 млрд сўм маблағларни якуний истеъмолчига қайта ҳисоб-китоб қилиш бўйича белгиланган тартибда бажарилиши мажбурий бўлган кўрсатма берилди.

 

Ҳозирги кунда мазкур иш суд тартибида кўриб чиқилмоқда.