Жиззах вилоятида таълим соҳаси мансабдори пора олаётган вақтида қўлга тушди
У Мактабгача таълим ташкилотида текширув ўтказмаслик эвазига муассаса раҳбаридан 4 миллион 800 минг сўм пул талаб қилган.
Коррупцияга қарши курашиш йўналишида Давлат хавфсизлик хизмати ҳамда прокуратура органлари ходимлари ҳамкорлигида ўтказилган тезкор тадбир давомида вилоят таълим тизими масъулларидан бирининг ноқонуний ҳаракатлари фош этилди. Бу ҳақда ДХХ Zamon.uz'га хабар берди.
Аниқланишича, мактабгача ва мактаб таълими бўлими бошлиғи ўз мансаб ваколатини суистеъмол қилиб, давлат мактабгача таълим ташкилотларидан бирида текширув ўтказмаслик эвазига муассаса раҳбаридан 4 миллион 800 минг сўм миқдорида пора талаб қилган.
Мазкур мансабдор шахс сўралган пул маблағини тамагирлик йўли билан олаётган вақтида тезкор тадбир давомида ашёвий далиллар билан ушланган.
Ҳолат юзасидан унга нисбатан Жиноят кодексининг 210-моддаси 2-қисми «в» банди билан жиноят иши қўзғатилиб, ҳозирда тергов ҳаракатлари олиб борилмоқда.
Шунингдек, тергов жараёнида мазкур шахснинг Жиноят кодексининг 167, 209 ҳамда 243-моддаларида назарда тутилган бошқа ноқонуний ҳаракатлари ҳам аниқланган.
