Отамуродга “Президент совғаси” — BYD Chazor топширилди
Ўзбекистон Президенти ёшлар билан ўтказган мулоқоти давомида хоразмлик Отамурод Райимбоевни “Президент совғаси” билан тақдирлаган эди.
Аввалроқ Кўксарой қароргоҳида бўлиб ўтган Шавкат Мирзиёевнинг ёшлар билан учрашувида Хоразм вилояти Урганч тумани 11-сон болалар мусиқа ва санъат мактабининг 4-синф ўқувчиси Отамурод Райимбоев ўзининг юксак ижро маҳоратини намойиш этган эди.
Ёш истеъдод эгаси Ўзбекистон халқ артисти Комилжон Отаниёзов репертуаридан қўшиқни жонли ижрода куйлаб, йиғилганларда катта таассурот қолдирган. Унинг саҳнадаги ишончли чиқиши ва табиий истеъдоди Президент томонидан алоҳида эътироф этилиб, ёш ижодкорга автомобиль совға қилишга қарор қилингани ҳақида хабар берилган эди.
Бугун мазкур махсус совға вилоят ҳокими Жўрабек Рахимов томонидан Отамурод Райимбоевга унинг оила аъзолари ҳамда устозлари иштирокида тантанали равишда топширилди.
Маросим давомида ёш ижодкор ва унинг ота-онаси давлат раҳбарининг бундай юксак эътибори ва рағбати учу миннатдорлик изҳор этдилар. Таъкидланганидек, бундай эътироф ёш авлодни санъат ва ижод йўлида янада катта марраларни забт этишга руҳлантиради.
