БАА, Қатар ва Баҳрайн ҳаво ҳудуди вақтинча ёпилди
Абу-Дабида портлашлар қайд этилган.
Форс кўрфази мамлакатлари — Баҳрайн, Қатар ҳамда БАА минтақадаги кескин вазият сабаб ўз ҳаво ҳудудларини вақтинча ёпганини маълум қилди.
ТАСС агентлиги хабарига кўра, Қатар ва Баҳрайн ўз ҳудудларида фуқаролик рейсларини тўлиқ чеклаган. БАА эса хавфсизлик чораси сифатида ҳаво ҳудудини қисман ёпганини билдирган.
Маҳаллий ОАВ маълумотларига кўра, Абу-Дабида портлашлар қайд этилган. Шунингдек, Баҳрайн ва Қатардаги АҚШ ҳарбий базаларига нисбатан ракета зарбалари берилгани ҳақида тасдиқланмаган хабарлар тарқалган.
Россиянинг Қатардаги элчихонаси Россия фуқароларини эҳтиёткор бўлишга, ҳарбий иншоотлардан узоқроқ юришга ва зарурат бўлмаганда ташқарига чиқмасликка чақирган.
Аввалроқ Эрон ҳам Исроил билан боғлиқ ҳарбий кескинлик ортидан ўз ҳаво ҳудудини ёпган эди. Россия Транспорт вазирлиги эса Россия авиакомпанияларининг БААга парвоз йўналишларига ўзгартиришлар киритилишини эълон қилган.
