Бухорода Telegram’да онлайн фоҳишахона ташкил қилган йигит ушланди
21 ёшли йигит мессенжерида махсус канал ташкил этиб, унда аёлларнинг суратларини жойлаштирган ва уларнинг хизматларини муайян пул маблағи эвазига таклиф қилиб келган.
Бухоро вилояти Ички ишлар бошқармаси Тезкор-қидирув хизмати ходимлари томонидан ўтказилган навбатдаги тезкор тадбир давомида 21 ёшли фуқаронинг моддий манфаат орттириш мақсадида қонунга хилоф фаолият юритиб келаётгани аниқланган.
Маълум бўлишича, у Telegram мессенжерида махсус канал ташкил этиб, унда аёлларнинг суратларини жойлаштирган ҳамда уларнинг хизматларини соатбай ва тунбай кўринишда муайян пул маблағи эвазига таклиф қилиб келган.
Жорий йилнинг 12 февраль куни соат тахминан 15:00 ларда у Бухоро шаҳридаги хонадонлардан бирида мижозга жинсий алоқа учун ўзининг Telegram гуруҳидаги аёллардан бирини 400 минг сўм эвазига гаплашиб берган. Ушбу хизмат учун воситачи сифатида 100 минг сўм миқдорида ҳақ талаб қилган.
Тезкор тадбир давомида у 100 минг сўм миқдоридаги пул маблағини олаётган вақтида ашёвий далиллар билан қўлга олинган.
Мазкур ҳолат юзасидан гумонланувчига нисбатан Ўзбекистон Республикаси Жиноят кодексининг 131-моддаси 1-қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
