Тошкентда Тracker'да одамларни қасддан уриб кетган ҳайдовчига жиноят иши қўзғатилди
Ҳозирда ҳолат юзасидан жиноят иши очилиб, тергов ҳаракатлари олиб борилмоқда.
Тошкент шаҳри Юнусобод туманида 26 март куни Tracker ҳайдовчиси бир гуруҳ одамларни қасддан уриб юборгани юзасидан жиноят иши қўзғатилди. Бу ҳақда пойтахт ИИББ ахборот хизмати хабар берди.
Маълум қилинишича, ижтимоий тармоқларда тарқалган видео юзасидан ўрганиш ишлари олиб борилган. Ҳодиса тумандаги Ниёзбек йўли ва Халқобод кўчалари кесишган чорраҳада содир бўлган. Воқеа жойига етиб борилганида, фуқаролар ўртасида келишмовчилик оқибатида жанжал юзага келгани аниқланган.
Жанжал якунланиш арафасида бўлган пайтда Tracker ҳайдовчиси ҳаракатланиб келиб, тўрт нафар фуқарони уриб юборган. Ҳодиса жойидан зарур далилий ашёлар расмийлаштириб олинган.
Мазкур ҳолат юзасидан туман прокуратураси томонидан Жиноят кодексининг 25-моддаси орқали 97-моддаси (қасддан одам ўлдиришга уриниш) ҳамда 277-моддаси (безорилик) билан жиноят иши қўзғатилган. Ҳозирда тергов ҳаракатлари олиб борилмоқда.
Аввалроқ Самарқандда вояга етмаган йигит 5 ёшли қизчани машинада уриб, қочиб кетгани ҳақида хабар берилганди.
