АҚШ ўзининг минглаб десантчиларини Яқин Шарққа жойлаштирмоқда
Ҳарбийлар Эроннинг нефть экспорти учун муҳим бўлган Харг оролини эгаллаш учун сафарбар қилиниши мумкин.
АҚШ армиясининг элита 82-ҳаво-десант дивизиясига қарашли минглаб ҳарбийлар Яқин Шарққа етиб келишни бошлади. Бу ҳақда Reuters икки америкалик расмий манбага таяниб хабар берди.
Қайд этилишича, бу воқеа АҚШ президенти Доналд Трамп Эрон билан уруш бўйича кейинги қадамларини кўриб чиқаётган бир пайтда рўй бермоқда.
Шимолий Каролина штатининг Форт-Брегг шаҳрида жойлашган парашютчилар минтақага юборилган минглаб қўшимча денгизчилар, денгиз пиёдалари ва махсус операция кучларига қўшилишади. Дам олиш кунлари Яқин Шарққа тахминан 2500 денгиз пиёдаси етиб келди.
Аноним манбалар журналистларга қўшинларнинг аниқ қаерда жойлаштирилиши ҳозирча маълум қилинмаганини билдирган.
“Қўшимча кучлар 82-ҳаво-десант дивизиясининг штаб бўлинмалари, баъзи логистика ва бошқа ёрдамчи бўлинмалар ҳамда битта жанговар бригадани ўз ичига олади. Эрон томонига қўшин юбориш бўйича якуний қарор ҳозирча қабул қилинмаган, аммо улар минтақадаги келажакдаги операциялар учун қувватни оширади”, — дея Reuters бир расмийнинг сўзларини келтирган.
Маълум қилинишича, ҳарбийлар Эрон билан урушда бир нечта мақсадда, хусусан, Эрон нефть экспортининг 90 фоизи тўғри келадиган Харг оролини эгаллаб олиш учун сафарбар этилиши мумкинлиги қайд этилмоқда.
“АҚШ қуруқлик қўшинларининг ҳар қандай қўлланилиши Доналд Трамп учун жиддий сиёсий рискларни юзага келтириши мумкин, чунки АҚШ жамоатчилиги Эронга қарши урушни қўллаб-қувватламайди ва президентнинг сайловолди ваъдалари АҚШни Яқин Шарқдаги янги можароларга жалб қилмасликни назарда тутган эди”, дейилади хабарда.
