Фарғонада банк ходими томонидан ўлдирилган фуқаронинг жасади топилди

Фарғона вилояти Қўқон шаҳрида 30 март куни банк ходими мижозни ўлдириб, Катта Фарғона каналига ташлаб юборгани ҳақида хабар берилганди. “Zamon” информацион дастури ва “Kun.uz” мазкур воқеа тафсилотлари юзасидан маълумот берди.

 

Маълумотларга кўра, 30 март куни Ўзбекистон тумани “Ўқчи” маҳалласида яшовчи 28 ёшли фуқаро Санжар Эсоналиев муддатли тўлов асосида автомобиль харид қилиш мақсадида “Инфинбанк”нинг Қўқон филиалига мурожаат қилган. Ҳужжатларни расмийлаштириш жараёнида у турмуш ўртоғи ва отасини ҳам банкка чақирган.

 

Қариндошлари ҳужжатлар расмийлаштирилгач ортга қайтган, фуқаронинг ўзи эса автомобилни олиб боришини айтиб банкда қолган. Ташқарида эса жияни Damas автомашинасида уни кутиб турган. Маълум бўлишича, тушлик вақтида у банк ходими билан бирга бинодан чиқиб, ходимнинг автомашинасига ўтириб кетган.

 

Тахминан соат 13:00 атрофида улар ўртасида жанжал келиб чиққан. Гумонланувчининг кўрсатмаларига кўра, у Ўзбекистон тумани “Тараққиёт” маҳалласи ҳудудида жабрланувчининг бўйин қисмига ошхона пичоғи билан жароҳат етказган.

 

Марҳумнинг қариндошлари унинг узоқ вақт қайтиб келмаганидан хавотирланиб, ички ишлар органларига мурожаат қилган. Кузатув камералари орқали унинг охирги ҳаракатлари аниқланган. Марҳумнинг амакиваччаси соат 17:00 гача банк ёнида уни кутиб турган, бироқ йигит қайтиб келмаган ва телефони ўчирилган бўлган.

 

Тергов маълумотларига кўра, гумонланувчи жиноятдан сўнг иш жойига қайтиб, далилларни беркитишга уринган. У пичоқни яшириб, кийимларини алмаштирган, автомобилини автоювиш шохобчасида тозалатган ва ишини давом эттирган. Кечга яқин эса марҳумнинг жасадини “Тўлаш” МФЙ ҳудудидан ўтувчи Катта Фарғона каналига олиб бориб ташлаган.

 

Шунингдек, жабрланувчи ёнида бўлган 5 700 АҚШ доллари миқдоридаги маблағнинг йўқолгани ҳам қайд этилган.

 

“Инфинбанк”нинг ходим ишлаган филиалидан ҳолат бўйича изоҳ сўралган. Бироқ ҳамкасбларидан ҳеч бири содир бўлган воқеа, гумонланувчининг шахсияти ва феъл-атвори ҳақида гапиришни истамаган. Ўша куни навбатчиликда бўлган қўриқлаш бўлими ходимлари банк ичида кредит бўлими мутахассиси ва марҳум ўртасида ҳеч қандай тортишув ёки жанжал бўлмаганини билдирган.

 

Мазкур ҳолат юзасидан гумонланувчи А.Т. қўлга олиниб, унга нисбатан жиноят иши қўзғатилган. Қўқон шаҳар прокуратураси томонидан тергов ҳаракатлари олиб борилмоқда.

 

Марҳумнинг жасади 4 апрель куни қидирув ишлари натижасида топилган. Қидирув жараёнига Фавқулодда вазиятлар хизмати ходимлари ва маҳаллий аҳоли ёрдам берган.