Тошкентда 2 нафар бозор қоровули итлар устига машина ҳайдади

Ижтимоий тармоқларда 2 нафар фуқаро автомашиналарида кучукларни устига ҳайдаётганликлари акс этган видео тарқалди. Мазкур ҳолат юзасидан Тошкент шаҳар ИИББ маълумот берди.

 

Маълум қилинишича, 5 апрель куни тахминан соат 23.00 ларда Учтепа туманидаги бозорларнинг бирида қоровул бўлиб ишловчи 1997 йилда туғилган Т.М. ва 1996 йилда туғилган М.Д. лар ўзларининг автомашиналарини кучуклар устига ҳайдаган.

    

Мазкур ҳолат юзасидан Учтепа тумани ИИО ФМБ томонидан Ўзбекистон Республикаси Маъмурий жавобгарлик тўғрисидаги кодексининг 111-моддаси (“Ҳайвонларга нисбатан шафқатсиз муносабатда бўлиш”) аломатлари билан маъмурий баённома расмийлаштирилган. 

 

Тўпланган ҳужжатлар қонуний чора кўриш учун Жиноят ишлари бўйича туман судига юборилган.

 

Аввалроқ Ўзбекистон Экологик партияси ҳайвонларга нисбатан шафқатсизлик учун жавобгарликни кескин кучайтиришни назарда тутувчи қонун лойиҳасини тайёрлаётгани ҳақида хабар бергандик.

 

Таклиф этилаётган янги қонун лойиҳасида эса жазо чораларини янада кучайтириш кўзда тутилган. Хусусан, ҳайвонларга нисбатан шафқатсизлик учун жарималарни 200 БҲМгача (80 млн сўмдан ортиқ) ошириш ҳамда бир йилгача озодликдан маҳрум қилиш жазосини жорий этиш таклиф қилинмоқда.