Андижон, Наманган ва Фарғонада  мансабдорлар пора билан ушланди

Андижон, Наманган ва Фарғона вилоятларида бир нечта коррупсион ҳолатлар аниқланиб, мансабдор шахслар ашёвий далиллар билан ушланди. Бу ҳақда Zamon.uz'га ДХХ хабар берди.

 

Аввалроқ Андижондаги ҳолатда вилоят ҳокими ўринбосари Исомиддин Исманов пора билан қўлга олингани ҳақида хабар берилганди. ДХХ томонидан ўтказилган тезкор тадбир тасвирлари эълон қилинди.

 

Маълум бўлишича, Исомиддин Исманов ўз хизмат мавқеидан фойдаланиб, тадбиркордан 20 сотих давлат захирасидаги ер майдонини расмийлаштириб бериш ва қурилиш ишлари учун рухсатнома олиш эвазига 50 минг АҚШ долларини талаб қилган. Давлат хавфсизлик хизмати ходимлари томонидан ўтказилган тезкор тадбирда мансабдор шахс ўз яшаш хонадонида пулни олаётган вақтда ушланган.

 

Шунингдек, Наманганда туман қурилиш бўлими бош архитектори, маҳаллий оилавий корхонага тегишли автомобиллар ювиш шохобчасининг лойиҳа ҳужжатларини расмийлаштириб бериш ва тасарруф қилиш бўйича тақиқни бекор қилиш эвазига 1500 АҚШ долларини талаб қилгани аниқланган. Тезкор тадбирда бош архитектор 1000 долларни тамагирлик йўли билан олган вақтида ушланган. 

 

Маълумотларга кўра, корхона раҳбари илгари суд томонидан 43,3 млн сўм жарима тўлаган, аммо бош архитектор унга қонуний ечим кўрсатмасдан, пора талаб қилган.

 

Фарғона вилояти Қўштепа туманидаги Бандликка кўмаклашиш бўлими бошлиғи ўринбосари эса ўз хизмат мавқеидан фойдаланган ҳолда, маҳаллий фуқаронинг ишонганини ишлатиб, уни Андижон вилоятидаги олий таълим муассасасига кириш эвазига 2000 АҚШ долларини олган. Ушу мансабдор ҳам Давлат хавфсизлик хизмати ва Иқтисодий жиноятларга қарши курашиш департаменти томонидан ушланган.

 

Ҳозирда ҳар учала ҳолат юзасидан қонунбузарларга нисбатан Жиноят Кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.