“Бу биз тузган битим эмас”: Трамп Эронни сулҳни бузганликда айблади

АҚШ президенти Доналд Трамп Эронни Ҳормуз бўғози орқали кемалар ҳаракатини чеклашда айблади ва мавжуд келишув шартлари бузилаётганини маълум қилди.

 

Унинг таъкидлашича, Эрон сулҳ мажбуриятларини “жуда ёмон”, ҳатто “инсофсиз” тарзда бажармоқда. Трамп Ҳормуз бўғози орқали нефть ташиш жараёни тўлиқ таъминланмаётганини билдириб, бу ҳолат дастлабки келишувга зид эканини қайд этди.

 

Шунингдек, у Эрон томонидан бўғоздан ўтувчи танкерлар учун тўлов ундирилаётгани ҳақидаги хабарларга муносабат билдириб, агар бу маълумотлар рост бўлса, Теҳрон зудлик билан бундай амалиётни тўхтатиши лозимлигини билдирди.

 

8 апрелга ўтар кечаси АҚШ томони Эрон билан икки ҳафталик сулҳ эълон қилган ва Ҳормуз бўғозининг дарҳол очилиши эвазига ҳаво ҳужумларини тўхтатишга ваъда берган. Шу билан бирга, АҚШ Эрон томонидан тақдим этилган 10 банддан иборат таклифни ҳам қабул қилиб олганини маълум қилди.

 

Ушбу таклифда Эрон Ҳормуз бўғозидан ўтадиган кемалардан тўлов ундирилиши ва маблағлар урушда вайрон бўлган жойларни тиклашга йўналтирилишини айтган эди. 

 

Шунингдек, Эрон сулҳга Ливан ҳам киритилишини талаб қилган. Лекин Исроил бош вазири Бинямин Нетаняҳу, оташкесим Ливанга тааллуқли эмаслигини билдирган. АҚШ ва Эрон сулҳи эълон қилингач Исроил қирувчи самолётлари Ливан бўйлаб 10 дақиқалик шиддатли ҳаво ҳужумини амалга оширди. 

 

Ливан соғлиқни сақлаш вазирлиги маълумотларига кўра, ушбу ҳужум оқибатида камида 303 киши ҳалок бўлди ва 1150 киши яраланди.

 

Кейинчалик томонлар баёнотларидан келиб чиқиб, сулҳ шартлари ва музокараларни бошлаш масаласида АҚШ ва Эрон ўртасида жиддий тафовутлар мавжудлиги ойдинлашди. Ҳозирча Ҳормуз бўғози амалда ёпиқ бўлиб қолмоқда, ундан ўтаётган кемалар эса Эрон билан алоҳида келишишга мажбур бўлмоқда.