Чирчиқда вагон устига чиққан ўсмирни ток урди
У вагон устида селфи тушмоқчи бўлган.
Тошкент вилоятининг Чирчиқ шаҳрида 17 ёшли ўсмирни поезд вагони устида ток уриб, у оғир аҳволда шифохонага ётқизилди. Бу ҳақда “Мillar” кўрсатувида хабар берилди.
Маълум қилинишича, ҳодиса 1 апрель куни Бўзсув темирйўл станциясида юз берган. 2009 йилда туғилган йигит дўстлари билан бирга Бўзсув темирйўл станциясида турган вагонлардан бирининг устига чиқиб, селфи тушмоқчи бўлган. Шу пайт электр тармоғидаги юқори кучланиш сабаб йигитни ток урган.
Шифокорларнинг қайд этишича, кучланишдан юзага келган электр ёйи алангаси оқибатида ўсмир оғир куйиш жароҳатини олиб, ерга йиқилган. Текширувларда йигит танасининг қарийб 80–85 фоизи куйгани аниқланиб, у реанимация бўлимига жойлаштирилган.
Шифокорлар унинг аҳволи ўта оғир эканини билдириб, беморга интенсив даволаш муолажалари олиб борилаётганини ва ҳолат доимий назорат остида эканини маълум қилди.
