Қирғизистонда қалбаки пул ишлаб чиқарувчи халқаро гуруҳ фош этилди
Махсус операция давомида Ўзбекистон ва Қирғизистон фуқаролари қўлга олинган.
Қирғизистонда қалбаки пул ишлаб чиқариш ва тарқатиш билан шуғулланган халқаро жиноий гуруҳ фаолияти фош этилди. Бу ҳақда Қирғизистон Давлат Миллий хавфсизлик қўмитаси (ГКНБ) га таяниб Open.kg хабар берди.
Расмий ахборотга кўра, мазкур гуруҳ бир нечта давлат ҳудудида фаолият юритиб, юқори сифатли қалбаки банкноталарни тайёрлаш ва уларни мураккаб тақсимот тармоғи орқали реализация қилиш билан шуғулланган.
Ўтказилган махсус операция давомида Ўзбекистон ва Қирғизистон фуқаролари назорат остидаги “синов хариди” жараёнида қўлга олинган. Тинтувлар давомида катта миқдорда қалбаки хорижий валюта ҳамда ишга алоқадор бошқа ашёвий далиллар мусодара қилинган.
Мазкур ҳолат юзасидан Қирғизистон Жиноят кодексининг 233-моддаси билан жиноий иш қўзғатилиб, гумонланувчилар ГКНБ тергов ҳибсхонасига жойлаштирилган.
Ҳозирда ҳуқуқни муҳофаза қилувчи органлар томонидан ушбу жиноий тармоқнинг барча иштирокчиларини аниқлаш, шунингдек, қалбаки пулларни тарқатиш каналларини фош этиш бўйича тезкор-қидирув ва тергов ҳаракатлари давом эттирилмоқда.
