Эрон делегацияси АҚШ билан музокара ўтказиш учун Исломободга етиб келди
Шунингдек, АҚШ вице-президенти Жей Ди Вэнс ҳам Покистонга жўнаб кетган.
Эрон расмийлари АҚШ билан ўт очишни тўхтатиш бўйича музокаралар учун Покистон пойтахтига етиб келди. Бу ҳақда Al Jazeera хабар берди.
Маълум қилинишича, Эрон парламенти спикери Муҳаммад Бағир Ғолибоф ва ташқи ишлар вазири Аббос Ароқчи бошчилигидаги делегация Исломободда музокаралар ўтказади.
АҚШ томонидан музокараларга вице-президент Жей Ди Вэнс бошчилик қилмоқда. У Покистонга жўнаб кетишидан олдин берган баёнотида, агар Эрон томони музокараларга самимий ёндашса, Вашингтон ҳам очиқ мулоқотга тайёр эканини таъкидлаган.
Айни пайтда, Яқин Шарқдаги вазият кескинлигича қолмоқда. Ливан Соғлиқни сақлаш вазирлиги маълумотига кўра, Исроил ҳужумлари оқибатида мамлакат бўйлаб ҳалок бўлганлар сони 357 нафарга етган. Қайд этилишича, бу рақам якуний эмас ва қидирув ишлари давом этмоқда.
Шу билан бирга, Ливан ва Исроилнинг АҚШдаги элчилари ўртасида телефон орқали мулоқот бўлиб ўтган. Бу икки давлат ўртасидаги илк тўғридан-тўғри алоқа сифатида баҳоланмоқда. Манбаларга кўра, келаси ҳафта АҚШда ўт очишни тўхтатиш бўйича навбатдаги музокаралар ўтказилиши кутилмоқда.
