Эрон миналар сабаб Ҳормуз бўғозини тўлиқ очолмаяпти — The New York Times
Бўғозда кўплаб миналар координаталари қайд этилмасдан ўрнатилгани айтилмоқда.
Эрон Ҳормуз бўғозида ўрнатилган миналарни аниқлаш ва зарарсизлантиришдаги қийинчиликлар сабаб денгиз йўлини тўлиқ очолмаяпти. Бу ҳақда The New York Times АҚШ расмийларига таяниб хабар берди.
Қайд этилишича, Ислом инқилоби қўриқчилари корпуси (ИИҚК) март ойида АҚШ ва Исроил томонидан ҳарбий ҳаракатлар бошланганидан кўп ўтмай кичик кемалар ёрдамида бўғозни миналаган. Бу эса минтақада кема қатновининг тўхташига ҳамда жаҳон энергия ресурслари нархининг кескин ошишига олиб келган. Бўғоз орқали ўтиш фақат Россия ва Хитой каби дўст давлатлар кемалари ҳамда бож тўлашга рози бўлганлар учун очилган.
The New York Times хабарига кўра, ИИҚК Ҳормуз бўғозидан ўтиш учун “хавфсиз йўлаклар” харитасини тарқатган. Бироқ бу хариталарнинг аниқлиги шубҳа остида. Кўплаб миналар тартибсиз равишда ва координаталари қайд этилмасдан ўрнатилган, айрим портловчи қурилмалар эса атайлаб эркин сузишга қўйиб юборилган. Бу эса уларни аниқлаш ва зарарсизлантиришни мураккаблаштиради.
АҚШ расмийлари нашрга берган интервьюсида денгиз миналарини зарарсизлантириш уларни ўрнатишдан анча мураккаб жараён эканини таъкидлаган. Уларнинг айтишича, на АҚШ, на Эрон миналарни тезкор зарарсизлантириш учун етарли даражада кучли техникага эга эмас. АҚШ ҳарбийларида фақат мина қўриқчилари бўлган қирғоқ кемалари мавжуд, Эрон кучлари эса ҳатто ўз ўқ-дориларини ҳам тезда зарарсизлантириш имкониятига эга эмас.
Ҳормуз бўғози стратегик жиҳатдан муҳим йўналиш бўлиб, у орқали дунё нефтининг қарийб 15 фоизи ва суюлтирилган табиий газнинг 20 фоизи ташилади.
АҚШ Эрон томондан денгиз йўлини тўлиқ очишни талаб қилмоқда, акс ҳолда ҳарбий ҳаракатлар қайта бошланиши мумкин. Эрон ва АҚШ делегациялари музокара ўтказиш учун Исломободга етиб борган. Ҳозирда билвосита учрашувлар бўлиб ўтган.
