Келишув бўлмаса, Эронга ҳужумлар қайта бошланиши мумкин — Трамп
Вашингтон ҳарбий салоҳиятни кучайтираётганини маълум қилди.
Доналд Трамп АҚШ ва Эрон ўртасидаги музокаралар муваффақиятсиз якунланган тақдирда, Вашингтон Теҳронга қарши ҳарбий ҳаракатларни қайта бошлаши мумкинлигини маълум қилди.
АҚШ раҳбари бу ҳақда New York Post нашрига берган интервьюсида баён қилиб, мамлакат ҳарбий салоҳияти янада кучайтирилаётганини таъкидлаган. Унинг сўзларига кўра, АҚШ ҳарбий кучлари энг замонавий қурол-аслаҳа билан таъминланмоқда ва зарурат туғилганда улардан самарали фойдаланишга тайёр.
Маълум қилинишича, АҚШ ва Эрон делегациялари ўртасидаги музокаралар 11 апрель куни Исломобод шаҳрида ўтказилиши режалаштирилган. Учрашув Тошкент вақти билан соат 17:00 дан кейин бошланиши маълум қилинган.
Америка делегациясига Ж. Д. Венс бошчилик қилмоқда. Унинг таркибига АҚШ президентининг махсус вакили Стив Уиткофф ҳамда Жаред Кушнер кирган. Делегация Исломободга АҚШ ҳарбий-ҳаво кучларига қарашли самолётларда етиб келган.
Эрон делегациясига эса парламент раиси Муҳаммад Багир Ғолибаф ва ташқи ишлар вазири Аббос Ароқчи бошчилик қилмоқда.
Мазкур музокаралар минтақадаги кескинликни юмшатиш ва томонлар ўртасида келишувга эришиш йўлидаги муҳим босқич сифатида баҳоланмоқда.
