Россия ва Украина ўртасида 175 нафардан ҳарбий асир алмашилди
Жараёнда БАА воситачи сифатида иштирок этди.
Россия Мудофаа вазирлиги маълумотига кўра, алмашинув доирасида Россия томони Украина асирлигидан 175 нафар ҳарбий хизматчини қайтариб олди ҳамда ўз навбатида 175 нафар украиналик ҳарбийни топширган.
Қайд этилишича, қайтарилган россиялик ҳарбийлар ҳозирда Беларус ҳудудида бўлиб, уларга зарур тиббий ва психологик ёрдам кўрсатилмоқда. Кейинчалик улар Россия ҳудудидаги махсус тиббиёт муассасаларига олиб борилиб, даволаниш ва реабилитация жараёнидан ўтказилади.
Мазкур жараёнда Бирлашган Араб Амирликлари воситачи сифатида иштирок этиб, гуманитар ёрдам кўрсатгани таъкидланган.
Шунингдек, Владимир Зеленский ўз баёнотида алмашинув натижасида 175 нафар ҳарбий хизматчидан ташқари яна 7 нафар украиналик тинч аҳоли вакили ҳам қайтарилганини маълум қилган.
