Россияда Telegram тўлиқ блокланди
Сўнгги 24 соат ичида Тelegram'даги носозликлар юзасидан фойдаланувчилардан 2,6 мингта шикоят келиб тушган.
Россияда Telegram мессенжери ишлашида жиддий узилишлар кузатилмоқда. Бу ҳақда “Агентство” хабар берди.
OONI маълумотларига кўра, жума куни эрталаб киришдаги носозликлар даражаси 95 фоизга етган — бу сўнгги ҳафталардаги энг юқори кўрсаткичдир.
Таққослаш учун, WhatsApp ва Signal мессенжерларида ушбу кўрсаткич 89 фоизни ташкил этган. Бу эса Telegram'га нисбатан чекловлар кучлироқ бўлиши мумкинлигини кўрсатади.
Downdetector маълумотларига кўра, сўнгги 24 соат ичида фойдаланувчилардан 2,6 мингта шикоят келиб тушган. Мурожаатларнинг асосий қисми Москва, Санкт-Петербург ва бошқа йирик ҳудудлардан қайд этилган.
Айрим ҳолатларда носозликлар VPN хизматларидан фойдаланувчиларга ҳам таъсир қилгани тахмин қилинмоқда.
Кузатувчиларга кўра, вазият Россияда “Мемориал” инсон ҳуқуқлари ташкилоти фаолияти тақиқланиши ҳамда “Новая Газета” таҳририятида ўтказилган тинтувлардан кейин кескинлашган.
Аввалроқ Россияда Telegram блокланиши ортидан Федерацияда Ўзбекистон СИМ-карталарини сотиб олиш кўпаяётгани ҳақида хабар берилганди.
