Ҳар қандай нотўғри ҳаракат жиддий оқибатларга олиб келади — IRGC
Эрон АҚШ таҳдидига жавобан кескин огоҳлантириш билан чиқди.
Ислом инқилоби қўриқчилари корпуси АҚШ президенти Дональд Трамп томонидан илгари сурилган Ҳормуз бўғозини блокировка қилиш таҳдидига жавоб қайтарди.
IRGC матбуот хизмати баёнотига кўра, Эрон қуролли кучлари стратегик сув йўлида юз бераётган барча жараёнларни доимий равишда назорат қилиб бормоқда. Таъкидланишича, кемалар ҳаракати замонавий технологиялар, жумладан, учувчисиз учиш аппаратлари ёрдамида кузатилмоқда.
“Барча ҳаракатлар ва уларнинг йўқлиги қуролли кучларимизнинг тўлиқ назорати остида. Ҳар қандай нотўғри қадам душманни бўғознинг ҳалокатли гирдобларига тортади”, — дейилади баёнотда.
Шунингдек, Эрон томони ўзининг жанговар тайёргарлигини намойиш этиш мақсадида Ҳормуз бўғози яқинидаги ҳудудда олинган дрон тасвирларини ҳам эълон қилган.
Аввалроқ, айрим манбаларда АҚШ денгиз кучларининг иккита ҳарбий кемаси бўғоздан ўтишга уринган пайтда кескин вазият юзага келгани, зарба бериш эҳтимоли фонида улар ортга чекингани ҳақида хабарлар тарқалган эди.
