Андижонда иқлимга мос сув таъминоти лойиҳаси бўйича жамоатчилик эшитуви ўтказилди

 

Андижон вилоятида аҳолини тоза ичимлик суви билан таъминлаш ҳамда канализация хизматларини яхшилашга қаратилган йирик лойиҳа доирасида жамоатчилик эшитуви ўтказилди.

 

Мазкур лойиҳа Осиё тараққиёт банки иштирокида молиялаштирилиб, Ўзбекистон Президентининг 2022 йил 24 майдаги 257-сон қарори ижроси доирасида амалга оширилмоқда. У “Иқлим шароитига мос сув таъминоти ва канализация хизматларини кўрсатиш” дастури асосида ҳаётга татбиқ этилмоқда.

 

Жамоатчилик эшитувида маҳаллий аҳоли вакиллари, фуқаролар йиғинлари раислари, давлат ташкилотлари мутасаддилари, экологик ташкилотлар ҳамда лойиҳа ташаббускорлари иштирок этди.

 

Тадбир давомида лойиҳанинг асосий мақсад ва вазифалари, амалга ошириш босқичлари ҳамда атроф-муҳитга эҳтимолий таъсири юзасидан батафсил маълумотлар тақдим этилди. Шунингдек, қурилиш жараёнида экологик хавфларни камайтириш бўйича кўзда тутилган чора-тадбирлар муҳокама қилинди.

 

Мутахассислар томонидан ичимлик суви таъминоти ва канализация тизимини ривожлантиришга доир режалаштирилган ишлар юзасидан тақдимотлар ўтказилди. Лойиҳа доирасида аҳоли учун қулайликлар яратиш, санитария ҳолатини яхшилаш ҳамда экологик барқарорликни таъминлаш устувор йўналишлар сифатида қайд этилди.

 

Эшитув жараёнида фуқаролар томонидан билдирилган таклиф ва мулоҳазалар инобатга олиниб, лойиҳани амалга оширишда очиқлик ва шаффофликни таъминлашга алоҳида эътибор қаратилди.

 

Таъкидланишича, бундай ташаббуслар аҳоли саломатлигини мустаҳкамлаш, турмуш даражасини ошириш ҳамда замонавий инфратузилмани ривожлантиришда муҳим аҳамият касб этади.