Трамп ўзини “шифо берувчи авлиё” қиёфасида тасвирланган суратини эълон қилди
Сунъий интеллект ёрдамида яратилган ушбу сурат Трамп Рим Папасининг тинчлик ҳақидаги баёнотларини танқид қилганидан сўнг жойланди.
АҚШ президенти Доналд Трамп ижтимоий тармоқда ўзини “шифо берувчи авлиё” қиёфасида тасвирланган суратини эълон қилди. Трамп ушбу тасвирга ҳеч қандай изоҳ ёки сарлавҳа қўшмаган.
DW хабарига кўра, расмни жойлашдан аввал, Трамп ўзининг Truth Social платформасида Папа Лео XIV ни кескин танқид қилган. Папа диний маросим чоғида “музокара столига ўтириш керак, ўлимга олиб келувчи қарорлар қабул қилинадиган столга эмас” деган мазмундаги чақириқ билан чиқиш қилган эди. Бунга жавобан Трамп папа сиёсий масалаларда “ёмон” эканини айтган.
“Мен Эроннинг ядровий қуролга эга бўлиши нормал ҳолат деб ҳисоблайдиган папага муҳтож эмасман. Мен Венесуэлага қарши АҚШ ҳужумини қоралайдиган папага муҳтож эмасман, айни пайтда бу мамлакат АҚШга катта миқдорда гиёҳванд моддалар юборади ва бундан ҳам ёмони, ўз қамоқхоналаридаги маҳбусларни — жумладан қотиллар, наркотик савдогарлари ва жиноятчиларни — бизнинг мамлакатимизга чиқариб юборади. Мен эса мени сайланган вазифамни бажараётганим учун танқид қиладиган папага ҳам муҳтож эмасман”, — деб ёзди Доналд Трамп.
Президентнинг фикрича, Папа Лео XIV ундан миннатдор бўлиши керак, чунки у фақат америкалик бўлгани учун папа этиб сайланган.
“Агар мен Оқ уйда бўлмаганимда, Лео Ватиканда бўлмас эди”, — дея қўшимча қилди у.
Шунингдек, Доналд Трумп Рим папасини соғлом фикр юритишга ва сиёсатчи эмас, Папа бўлишга чақирди.
11 апрель куни бутун дунё тинчлиги учун ўтказилган ибодат маросимида, илк марта АҚШдан сайланган Папа Лео XIV черков ҳар доим тинчликка чақиришини таъкидлаган эди.
