Венгрияда парламент сайловлари: Орбан мағлубиятини тан олди

Венгрия бош вазири Виктор Орбан парламент сайловларида ҳукмрон “Фидес” коалицияси мағлубиятга учраганини тан олди ва мухолифатдаги “Тиса” партиясини ғалаба билан табриклади. Бу ҳақда Reuters хабар бермоқда.

 

Миллий сайлов бюроси (НВИ) маълумотларига кўра, 12 апрель, якшанба кечқурун ҳолатига кўра, овозларнинг 81,49 фоизи саналгач, мухолифатчи Петер Мадяр бошчилигидаги “Тиса” партияси Венгрия парламент сайловларида етакчилик қилмоқда. 

 

Қайд этилишича, сайловда 5,8 миллиондан ортиқ фуқаро иштирок этган. Сайловчилар фаоллиги рекорд даражада — 77,8 фоизни ташкил этди. Мамлакатнинг янги бош вазири ким бўлиши 30 кун ичида маълум бўлиши кутилмоқда.

 

Ҳозирда Петер Мадияр бошчилигидаги “Тиса” партияси парламентдаги 199 ўриндан 137 тасини қўлга киритмоқда. Амалдаги бош вазир Виктор Орбан раҳбарлик қилаётган “Фидес” партияси ҳамда унинг иттифоқчиси Христиан-демократик халқ партияси (КДНП) эса 55 ўринга эга бўлмоқда. Яна 7 ўринга ўта ўнгчи “Бизнинг ватан” ҳаракати даъвогарлик қилмоқда. Шу тариқа, “Тиса” парламентда учдан икки қисмдан ортиқ ўринни эгаллаб, конституциявий кўпчиликни таъминламоқда.

 

Мухолифат етакчиси Мадярнинг билдиришича, Орбан уни сайловдаги ғалаба билан аллақачон табриклаган.

 

Ўз навбатида, Орбан Будапешт шаҳрида тарафдорлари олдида сўзга чиқиб, дастлабки натижаларни “аниқ” ва “аламли” деб баҳолади. 

 

“Мен ғолиб бўлган партияни табрикладим. Биз мухолифатда бўлсак-да, Венгрия халқига ва ватанимизга хизмат қилишда давом этамиз”, — деди у. 

 

Бу натижа Орбан учун сўнгги 16 йил ичидаги илк мағлубият сифатида қайд этилмоқда.

 

62 ёшли Орбан 2010 йилдан буён ҳокимият тепасида эди. Жорий сайловларда эса 45 ёшли Петер Мадяр илк бор жиддий рақобатчи сифатида майдонга чиқди. У аввал “Фидес” партиясининг ёшлар қанотида фаолият юритган, “Тиса” партиясига эса икки йил аввал раҳбарликни қўлга олган.

 

Сайловчилар орасида Орбан ҳукуматидан норозилик сабаблари сифатида жамоат инфратузилмаси, соғлиқни сақлаш ва таълим тизимларидаги муаммолар, шунингдек коррупция ҳолатлари кўрсатилмоқда. Мадяр эса коррупцияга қарши кескин курашиш, тизимли ислоҳотлар ўтказиш ва янги конституция қабул қилиш ниятини билдирган.

 

Шунингдек, у Венгриянинг Россиядан масофа сақлаши, ҳамда Европа Иттифоқи аъзоси сифатида НАТО доирасида ишончли иттифоқчи мақомини тиклаш тарафдори эканини таъкидлаган.

 

Reuters ғолиб партия етакчиси Петер Мадяр болалигида, 1990 йилда Венгриянинг биринчи демократик сайловларидан ҳаяжонланиб, ўша пайтда коммунизмга қарши курашувчи Виктор Орбаннинг суратини ётоқхона деворига ёпиштириб қўйганини ёзмоқда.