Швейцария санкциялар рўйхатини янгилади: Алишер Усмонов ундан чиқарилди
Россияга қарши чекловлар рўйхатига яна 254 та шахс ва ташкилот қўшилди.
Швейцария россиялик миллиардерлар Алишер Усмонов ва Михаил Фридманга, шунингдек, яна бир қатор шахслар ва ташкилотларга нисбатан жорий этилган санкцияларни бекор қилди. Бу ҳақда мамлакатнинг Иқтисодий масалалар бўйича давлат котибияти хабар берди.
Чекловлардан Вернадский номидаги Қрим федерал университетининг собиқ ректори Андрей Фалалеев ҳамда Redbird Corporate Services Ltd. компанияси ҳам чиқарилган. Тегишли ўзгаришлар 2026 йил 4 ноябрдан кучга кирган.
Бундан ташқари, уч киши вафот этгани сабабли санкциялар рўйхатидан чиқарилган. Улар — Давлат Думаси собиқ депутати Юрий Швиткин, дизайнер Александр Леонов ва Эрон ҳарбий раҳбари Алиреза Тангсири.
Шу билан бирга, Швейцария Россияга қарши санкциялар рўйхатини 254 та жисмоний ва юридик шахсга кенгайтирди. Янги рўйхатга Россиянинг 33 та банки, учинчи давлатнинг битта банки, 17 та молия муассасаси ва криптохизмат провайдерлари, учинчи мамлакатларнинг бешта компанияси, шунингдек, Россиянинг тўртта аэропорти ва иккита порти киритилган.
Эслатиб ўтамиз, аввалроқ Европа Иттифоқи ҳам Алишер Усмонов ва Михаил Фридманга нисбатан санкцияларни бекор қилган эди. Шунингдек, Германия Олий суди Усмоновнинг Европа Кенгашига қарши даъвосини блоклашни ноқонуний деб топган.
