“Американинг енгилмаслиги ҳақидаги афсона йўқолди” — Хоманаий

 

Эрон олий раҳбари Оятуллоҳ Можтабо Хоманаий АҚШдаги сайловлардан кейин мамлакат ташқи сиёсатида ўзгаришлар кутмаслик кераклигини билдирди. Бу ҳақда Таsnim ахборот агентлиги унинг сўзларига таяниб хабар берди.

 

Хоманаийнинг таъкидлашича, АҚШ сиёсатида партиялар ёки сиёсий гуруҳлар алмашиши Эрон халқига нисбатан муносабатни ўзгартирмайди. У Вашингтон билан келишувга эришиш ёки унга ён бериш орқали АҚШнинг Эронга нисбатан душманлигини тўхтатиш мумкин деб ҳисоблайдиганлар янглишаётганини айтган.

 

Эрон олий раҳбари АҚШнинг Эронга нисбатан сиёсати тарихий воқеалар, жумладан, 1953 йил августида бош вазир Муҳаммад Моссадиқ ҳукумати ағдарилган даврдан бошланганини таъкидлаган. Унинг сўзларига кўра, АҚШ 1979 йилги Ислом инқилобигача Эроннинг табиий ресурслари ва капиталидан фойдаланган, кейинчалик эса 1980–1988 йиллардаги Эрон-Ироқ урушида Ироқни қўллаб-қувватлаган, Эронга қарши санкциялар жорий этган ва мамлакат активларини музлатган.

 

Хоманаий, шунингдек, Ҳурмуз бўғози атрофидаги вазият “Американинг енгилмаслиги ҳақидаги афсонани йўққа чиқарганини” билдирган. Унинг огоҳлантиришича, АҚШ Эронга яна ҳужум қилган тақдирда, Теҳроннинг жавоб чоралари анча кенг кўламли бўлади.

 

Унинг фикрича, Вашингтоннинг асосий мақсади Эронни тўлиқ таслим қилишдан иборат. Хоманаий Қаршилик кўрсатиш ўқи ҳаракатларини эса янги дунё тартибига олиб борадиган йўл сифатида таърифлаган.