АҚШдаги оралиқ сайловнинг бозорларга таъсири: доллар курси бир ой ичидаги энг паст даражага тушди

АҚШда бўлиб ўтган оралиқ сайловларда демократларнинг ғалаба қозониши ортидан доллар курси бир ойдан ортиқ вақт ичидаги энг паст даражага тушди. Шу билан бирга, нефть нархи ва АҚШ давлат облигациялари даромадлилиги пасайди.

 

5 ноябрь куни доллар индекси 0,22 фоизга пасайиб, 101,25 пунктни ташкил этди. Бу 30-сентабрдан буён қайд этилган энг паст кўрсаткичдир. Бир кун аввал ҳам индекс 0,34 фоизга пасайган эди.

 

Reuters хабарига кўра, демократлар оралиқ сайловларда АҚШ Сенати ва Вакиллар палатасида кўпчилик ўринни қўлга киритган. Бу хабар ортидан АҚШ давлат облигациялари нархи ва жаҳон фонд бозорларидаги акциялар қиймати ошган.

 

National Australia Bank катта валюта стратегисти Родриго Катрилнинг фикрича, бозордаги ўзгаришлар Дональд Трамп маъмуриятининг сиёсий имкониятлари чекланиши мумкинлиги ҳақидаги кутилмалар билан боғлиқ. Хусусан, инвесторлар АҚШ президентининг Эронга қарши уруш ёки янги савдо божларини жорий этиш каби кескин чораларни амалга ошириш имконияти камайишини кутмоқда.

 

Мутахассиснинг таъкидлашича, валюта ва молия бозорларидаги қисқа муддатли тебранишлар ҳар доим ҳам узоқроқ муддатли тенденцияларни акс эттирмайди. Бироқ нефть нархи ҳамда облигациялар  даромадлилигининг пасайиши таваккалчиликка моил инвесторлар кайфиятига ижобий таъсир кўрсатмоқда.

 

Шунингдек, 5 ноябрь куни евро долларга нисбатан 0,29 фоизга қимматлаб, 1,1261 долларга етди. Япония иенаси эса 0,27 фоизга мустаҳкамланиб, бир доллар учун 157,95 иенани ташкил этди.

 

АҚШнинг 10 йиллик давлат облигациялари даромадлилиги 4,5 базис пунктга пасайиб, 4,847 фоизга тушди. Бу 10 сентябрдан буён энг паст кўрсаткич ҳисобланади.

 

Криптовалюталар бозорида биткоин 0,22 фоизга, эфир эса 0,11 фоизга қимматлашди. Уларнинг қиймати мос равишда 80 357,66 ва 2 419,79 долларни ташкил этди.